Facebook Addiction
Q: Main sara din ghar mein he baitha rehta hu, pehle dost hua karte the, lekin main FACEBOOK addiction ki wajah se unko bhi khud se door kar baitha hu. Sara din facebook he kholkar baitha rehta hu. Kai baar isse chhodne ki koshish ki lekin ek din bhi poora nahi nikaal pata. aur ajkal ek Whatsaap naam ki musibat aur aa gyi hai. Ab main Facebook Aur Whatsaap dono ko apne akelepan ka jimewaar manta hu. Kya karu ? iss chaske se kaise pichha chhudau ?
MOM : Yaad rakhna agar koi chiz tumhari kamzoori (Buri Adadt )hai to usse itna jyada aur badiya tareeke se karo ki wahi tumhari taqat ban jaye,
Chalo main tumhe apne bare mein batata hu, kaafi saal pehle maine ek facebook fan page banaya tha unsa naam rakha tha ‘Angoore Khate Hai’ wo page bohot mashoor ho gya, kai log usse like karne lage. Kyuki main usme unn lovers ki chori se khichi hui pics dalta tha jo parks mein chhup – chhup kar milte the. Meri khichi hui kai pics to shayad aaj bhi kai logo ke paas hongi. Ek ladki apne mummy – papa ke saath bus stand par khadi thi aur uska lover bhi saath mein he ajnabi banker khada tha. Unke nain-matake dekhkar mujhe shak hua to main camera ready karke kisi achhi si moment ka wait karne laga. Tabhi achanak uss ladki ne apne papa ki pith ke pichhe se ladke ko ek kagaz ka tukda diya ( I hope wo love latter ya phone no. type ka kuchh hoga) maine picture click kar li. Ek ladka barish mein bhig raha tha uski girlfriend ne uske seer ko bhigne se bachane ke liye apne purse ko uske seer par rakha hua tha, ek sikh ladki ko uska boyfriend godh mein uthakar mandir ki ghanti bajane ke liye usse ghanti tak pahucha raha tha ….. aur bhi bohut sari pics, kareeb 150 pics thi lekin logo ne uss page ko REPORT karke negative kar diya kyuki maine unka chehra na chhupane ki galti ki thi. Jin logo ki personal life ko mein page par dikha raha tha unki request par FACEBOOK ne mera page DELETE kar diya. Khair mujhe iss baat ka koi dukh nahi hua. Tumse mein ye kehna chahta hu ki chaska koi bhi bura nahi hota. Insaan chaske se bach nahi sakta . iska chaska nahi hoga to uska chaska hoga. Kaiyon ko padai karne ka chaska hota hai aur kaiyon ko sharab peene ka. Dekha jaye to dono mein koi ferk nahi hai.
Agar tumhe kisi chiz ki latt yani aadat hai, wo karne mein tumhe maza aata hai to usse apni taqat banao. Wahi tumhara nasha hai, wahi tumhara janoon hai , wahi tumhari taqat hai , usse karte –karte tum kabhi nahi thakoge.
Jo main batane ja raha hu wo sabse bada nahi balki sabse chhota kaam hai jo facebook ke zareeye tum kar sakte ho. Sabse pehle to apni ek achhi si photo facebook par post karo. Thik hai koi usse like nahi karega, kisi ko parwah nahi hogi ki tum kon ho, lekin iss kaam ko itna jyada aur badiya tareeke se karo ki yahi tumhari takat ban jaye. Tumhari har photo kisi aisi jagah par honi chahiye jaha kuchh aisa ho raha ho jo aam logo ko dekhne ko nahi milta. Jaise shahar bhar ke bhikhariyon ke saath photo khichwao, ya sadhu sanyasiyon ke saath. Kai log celebrities ke saath photo khichwate hai . yani wo apne facebook ke janoon par he kaam kar rahe hai lekin wo log sirf dusro ki posts he nahi dekh rahe wo dusro ko bhi apni posts dikha raha hai. ek ladke ne parchhaiyon ( shadows )ki images leni shuru ki thi. jaisie koi tree hai aur parchhai mein wo kisi ladki ki shape banata hai, poems likho, sher-shayri likho, stories likho … etc.
To sabse pehle apni ek post , kisi bhi kisam ki but wo kuchh aisi honi chahiye ki waisa kuch karte huye aam tor par log nahi dekh pate. Post karo. Main to kehta hu ek saath 10-20. Pics post karo. Pehle aaram se collect kar lo. Kuchh log usse like karenge, kum se kum tumhare dost to karenge. Facebook addicted ho, 2000 dost to banaye he honge na tumne ? unse bolo ki like kare ! aab jab tumhari pics logo ko pasand aane lagengi to tum khud he mehsoos karoge ki kuchh pics aur daalni chahiye, tumhe apne andar ek kalakar jaisi feeling aane lagegi. Tumhari aatma tumhe ghar se bahar dhakelegi, tumhara ghar tumhe katne ko dohdega. Jis kursi par baitheho wo tumhe jalta hua angara lagegi. Yaad rakhna IDEAS tareef sunkar he aate hai. Aur koi zareeya nahi hai new ideas ke liye isliye artists ki tareef kiya karo taki wo tumhe aur behtar kaam karke dikha sake. Ab tum nayi photo khichne ke liye bhage jaoge . tumhe nayi sambhawnao ka pata chalega.
Yaha se ek naya modd aayega. Tumhe achanak lagne lagega ki tumne facebook ko waqt dena kum kar diya hai. Kisi chiz se pichha chudane ka tareka hai ki usse pyaar karo , uska istemaal karo . istemaal karoge to tumhe pata chalega ki uske to agge bhi kai darwaze khulte hai. Iss waqt tumhari mushkil ye hai ki tum pehle darwaze par he atak gaye ho.
EXAMPLES :
- 1
Maan lo kisi ko poems padhne ka shonk hai. Agar wo ghar mein baithkar sirf books he padta rahe to kasoor books ka nahi hai, kasoor hai uss insaan ka jo khud bhi achhi poems likh sakta hai. Agar wo sirf padta rahega to pagal ho jayega. Aur agar wo likhne lagega to usse mehsoos hoga ki mujhe achhi kavita likhne ke liye experience ki jaroorat hai, wo bahar niklega. Kisi khubsurat ladki se milega, uski tareef ke lafz apne aap uski zubaar par ubhar ayenge. Wo kuchh behtreen likh payega, usse padkar usse aur confidence aayega , wo aur achha likhne ke liye dusri ladki se milega, fir teesri se, fir chaothi se. wo ek kabhi na khatam hone wale darwaazo ki duniya mein pahucha jayega. Chaska ye batata hai ki tumhare ander ek artist hai jo kisi chiz ke pichhe pagal hone ko marra jar aha hai. Chaska to shuruaat hota hai, kisi haseen safar ka.
- 2
jaise agar kisi ko jyada gussa aata hai, wo har kisi se ladta firta hai to usse BOXING jaisa sports khelna chahiye, Boxing sabse pehle tumhe discipline seekhati hai, khud par, apni takat par, apne deemag par control aur apne gusse ko sahi jagah par istemal karna seekhati hai. Wo exercise karega, apni diet ko itne discipline se khayega ki aap dekhkar heraan ho jayenge, wo sahi samay par soyega taki taro-taza hokar uth sake, jogging karne ja sake. Wo apne mann par control karne ke liye meditation karega taki wo jyada sawdaani se ladd sake. Aab uska maksad kisiki naak todni nahi hoga . aab uska maksaad achhe points banana hoga taki wo fights jeet sake.
- 3
- 4
Agar music tumhari kamzori hai, dance tumhari kamzori hai to Dance aur music seekho. Agar khubsurat ladkiya, make-up aur hairstyles tumhe pagal kar dete hai to Bus beautician bano, apna beauty parlor kholo. Kai log mujhse aakar puchhte hai ki hame kaise pata chale ki “hame kya achha lagta hai humara kis chiz mein interest hai. ‘3 Idiot’ film mein bataya gya hai ki wo karo jo karne mein tumhe maza ata hai”, lekin mujhe to koi shonk he nahi hai. Main unse kehta hu ki shonk sirf ache he nahi hote , sirf agar tumhe wildlife photography ya Music ka shonk hai tabhi tumhe apne shonk ka kaam karna chahiye ye zaroori nahi hai. 80% shonk buraaiyon mein chhupe hote hai.
Tumne suna hoga ki lohe ko loha kaat-ta hai, bus ussi terha chaske se pichha chhudwana chahte ho to chaske ko puri terha jeena he tumhe usse mukti dilwayega. Uss shonk ko itna jyada karo ki tum usse agge nikal jao, uske agle level tak pahuch jao.
- 5
Jante ho duniya mein machines kin logo ne banayi hai ? – jo log sust the, wo nikame the , wo uss kaam ko karna to chahte the par mehnat nahi karna chahte the. Jisne washing machine banayi agar wo mehnati hota to machine kyu banata , haatho se he kapde na dho leta ? Susti unki kamzori thi, aalas unki buri aadat thi. Jisne phone ki khoj ki wo roz apne dost se baatain karne uske ghar tak chalkar nahi jana chahta tha, jisne stove ki khoj ki wo roz aag jalakar khana nahi banana chahta tha. Ye scientist log koi bade mehnati nahi hote, ye philosopher , ye bade businessmen . hahaha tumhe ek baat batau ? main ek bada he sust insaan hu, aaram pasand. lekin mere aas-pass ke logo ko lagta hai ki main bohot mehnati hu. Main din mein 20 ghante kaam karta hu, mushkil se ek baar khana khata hu, wo kehte hai ki unhone mere jaisa mehnati insaan kabhi nahi dekha lekin agar tum mujhse puchho to main bus aaram kar raha hota hu, kyuki jo kaam karne mein tumhe maza aaye wo kaam tum darasal kar he nahi rahe hote , wo kaam to wo hota hai jo tum mehnat – mazdoori ke bich mein fursaat ke pallo mein karte ho taki tumhe aaram mile – mazdoori ke baad dil ko behlane ke liye jo kiya jaye wo kaam karne ke liye tum paida huye ho. Psychology aur religion mera time pass hai. Ye to main maze ke liye karta hu. Aab socho mein din mein 20 ghante maze kar raha hota hu. ye mera chaska kai, nasha hai, latt hai lekin main iske pehle darwaze par he atka nahi reh gya. Main isme aage badta gya. . . .
- 6
Agar tumhe sharab peene jaisi buri aadat hai to wo bhi tumhari takat ban sakti hai, jante ho duniya mein 9000 kism ki sharab hai, aur agar tum har roz ek alag terha ki sharaab peeyo to har sharab ko chakhne mein tumhe 24 saal lag jayenge. Duniya main aise kai writers hai jo batate hai ki kon si sharab duniya ki behtareen sharaab hai, kis sharaab ko peekar kaisa nasha hota hai . . . aur inn writers ki books ki market mein bohot demand hai. Badi sharab ki companies inn logo ko bohot paise deti hai taki ye log apni books mein inn companies ki sharab ki tareef likh de. Lekin 99% log sharaab ke 1 brand ke saath he label ki terha chipak gye hai. Unke pass to inta time bhi nahi hota ki agal – alag sharab ka swaad bata sake. Unhe to sabhi ek si lagti hai .
Haan nasha galat chiz hai. cigarette, drugs aur bhi aise bohot se nashe hai, lekin hum yaha shonk ki baat kar rahe hai, drugs lena shonk nahi hota. wo to bimari hai, uske liye kuchh aur tareeke hai.
- 7
Mere bhai ko bachpan se cartoon dekhne ka bada shonk tha, mujhe bhi tha lekin usse kuchh jyada he tha, aajkal wo T.V par aane wale cartoon shows ke liye stories likhta hai aur achha khassa kama leta hai.
Internet addiction unke liye bura hai jo iska faayda nahi utha rahe, dusri tarf kai logo ne online courses kiye hai, kai facebook pages ke zareeye paise kama rahe hai, kaiyon ne apni university ki degrees hasil ki hai. Aur kaiyon ne to bomb banana bhi seekh liye hai. Tum kya dusro ki daali hui posts he padte rahoge ?
Post a Comment